Gamehelpthecrew

Уводзіны

Мэта гульні — камандны пошук імавернай дзявятай плянэты ў нашай Сонечнай сыстэме праз выкананьне 50 розных місіяў нарастальнай складанасьці, але з абмежаванымі магчымасьцямі камунікацыі.

Кожная місія складаецца з сэрыяў задачаў і можа мець дадатковыя ўмовы для перамогі і/або перашкоды. Напрыклад, часта трэба выконвацьзадачы ў пэўным парадку.

Мэханіка гульні падобная да вісту ды іншых картавых гульняў на біткі, аднак адрозьніваецца ад іх тым, што гуляецца каапэратыўна, групай. Заданьні місіі выконваюць пэўныя гульцы, беручы біткі з патрэбнымі ім картамі.

Пачатковы расклад

Тальля складаецца з 36 каляровых картаў (значэньнямі ад 1 да 9 чатырох колераў) плюс 4 чорных ракетных картаў (ад 1 да 4).

Гэтыя 40 картаў картуюцца і раздаюцца ўсім пароўне (але ў гульні на траіх адзін гулец атрымае на адну картку болей).

Гулец, які атрымаў Ракету-4, становіцца Камандорам гэтай місіі, атрымлівае жэтон Камандора і мае хадзіць першым.

Кожны з гульцоў атрымлівае яшчэ шэрую карту напаміну (з выявай плянэты) і двухбаковы жэтон камунікацыі, кладучы іх перад сабой на стале. Жэтон камунікацыі кладзецца зялёным бокам угору.

Тварам уніз пасярод стала выкладаецца двухбаковы жэтон бедзтва (на Board Game Arena ён зьяўляецца ў зялёнай брыфінгавай зоне місіі).

Тальля 36 картаў заданьняў картуецца і выкладаецца закрытым бокам угору. Існуюць таксама 10 фіялетавых жэтонаў задачаў. Кожная спроба ў місіі адгэтуль мецьме выпадковы набор картаў заданьняў і можа (а можа й не) патрабаваць пэўнага набору жэтонаў задачаў. На Board Game Arena усё гэта апрацоўваецца фонава.

Місіі

Агулам у гульні 50 унікальных місіяў. Кожная місія апісвае ўмовы, зь якімі яна гуляецца.

Перад гульцамі выкладаецца столькі заданьняў, колькі напісана ва ўмовах місіі. Калі ў місіі не пазначана іншае, заданьні дзеляцца паміж гульцамі. Першым абірае Камандор, пасьля яго выбар працягваецца па стрэлцы да тае пары, пакуль ня будуць раздадзеныя ўсе місіі.

Некаторыя місіі могуць мець дадатковыя ўмовы, патлумачаныя ў апісаньні місіі.

Калі патрэбныя жэтоны заданьняў, некаторыя ці ўсе заданьні мусяць быць выкананыя ў пэўным парадку, напрыклад заданьне можа быць выкананае „першым“, „перад“ ці „пасьля“ іншага.

Гулец выконвае заданьне, беручы бітку з той картай, якая пазначаная на картцы заданьняў, калі гэтая бітка не пярэчыць іншым дадатковым умовам на жэтонах заданьняў.

Біткі

Пачынае хадзіць Камандор, далей рух па стрэлцы.

Перамагае ў бітцы найвышэйшая карта. Класьці трэба абавязкова тую ж фарбу, што выкладзеная ў бітцы першай, іначай — любую фарбу.

Ракеты сьвецяць і могуць быць перабітыя толькі ракетамі вышэйшага значэньня. Ракеты лічацца асобнай фарбай, і калі першай выкладзеная ракета, мусіце трымацца гэтай фарбы.

Наступны ход пачынае гулец, які ўзяў апошнюю бітку.

Заданьне лічыцца выкананым, як толькі гулец, які яго выконвае, узяў бітку, сярод картаў якой ёсьць пазначаная на ягонай картцы заданьняў.

Калі карту, пазначаную на картцы заданьняў гульца, узяў іншы гулец, альбо пры ўзяцьці патрэбнай карты ня былі выкананыя іншыя ўмовы заданьня / місіі, місія імгненна сканчаецца правалам, і гульня пачынаецца спачатку.

Камунікацыя

Адзін раз на місію у любы час вы можаце націснуць на сваю карту напаміну (у некаторых броўзэрах давядзецца націснуць у люьбым месцы карты, акрамя ўласна зялёнага жэтону камунікацыі), калі хочаце паведаміць, што будзеце дзяліцца абмежаванай інфармацыяй пра вашую руку зь іншымі гульцамі.

Націснуўшы на жэтон, вы камунікуеце не адразу — фаза камунікацыі надыходзіць перад пачаткам наступнай біткі. Вы загадзя папярэджваеце, што будзеце камунікаваць у наступнай даступнай фазе. Калі надыходзіць гэтая фаза, камунікацыя пачынаецца ад першага гульца і далей па стрэлцы. У гэтай фазе бяруць удзел толькі тыя гульцы, якія загадзя папярэдзілі, што будуць камунікаваць — калі вы не націснулі на жэтон своечасова, мусіце пачакаць да наступнага колу.

Калі вы падчас розыгрышу біткі выбралі жэтон камунікацыі, але пасьля перадумалі, у фазе камунікацыі вы можаце ўстрымацца, каб камунікаваць у будучыні (ці ўвогуле не камунікаваць).

Камунікуючы, выбіраеце адну карту з сваёй рукі. Выкладаеце яе адкрытай на стол пад жэтонам камунікацыі, які цяпер перакульваецца на чырвоны бок, каб пазначыць, што ў гэтай місіі ён выкарыстаны. На руку берацё шэрую карту напаміну, каб не забыцца, што адна з вашых картаў ляжыць на стале пад жэтонам камунікацыі.

Выкладзеная карта для камунікацыі мае быць:

• Найніжэйшай картай пэўнай фарбы на вашай руцэ (жэтон кладзецца ў ніжняй частцы карты)
• Адзінай картай пэўнай фарбы на вашай руцэ (жэтон кладзецца пасярэдзіне карты)
• Найвышэйшай картай пэўнай фарбы на вашай руцэ (жэтон кладзецца ў верхняй частцы карты)

Напрыклад, калі ў пэўны момант місіі вы маеце на руках карты з вочкамі 1, 2, 5 і 7 аднае фарбы, вы можаце камунікаваць альбо толькі пра 1 (найніжэйшую) альбо 7 (найвышэйшую), а 2 ці 5 ня можаце, бо яны не адпавядаюць ніводнаму крытэру камунікацыі з 3.

Скамунікаваная карта застаецца ляжаць адкрытай на стале, пакуль вы яе не згуляеце. Тады вяртаеце на стол карту напаміну з рукі.

Сыгнал бедзтва

Некаторыя місіі могуць быць надта складанымі з прычыны выдадзеных заданьняў і атрыманых картаў.

У такім разе напачатку місіі, пасьля раздачы картаў і заданьняў, але перад фазай камунікацыі і гуляньнем бітак, можна задзеяць чорны жэтон сыгналу бедзтва ў зялёнай брыфінгавай зоне місіі. Пасьля гэтага жэтон бедзтва перакульваецца, ягонае выкарыстаньне занатоўваецца ў бартавы журнал.

Кожны гулец можа перадаць адну з сваіх картаў суседу. Перадаваць ракетныя карты нельга. Перадаваць карты трэба ў тым самым кірунку — па ці супраць стрэлкі; каманда сама вырашае, у якім.

Дадатковыя ўмовы місіяў

Мёртвыя зоны

У такіх зонах камунікацыя яшчэ больш ускладненая.

Асноўная мэханіка камунікацыі (у сэнсе вызначэньня крытэраў, якімі картамі можна камунікаваць) не зьмяняецца, аднак жэтон камунікацыі трэба класьці пасярод карты.

У выніку вы ня ведаеце, што гулец хоча паведаміць пра карту (толькі тое, што яе мае; але невядома, ці яна ў іх найменшая, найбольшая ці адзіная ў гэтай фарбе).

Збой

У такіх місіях камунікацыя недаступная да пачатку пазначанай біткі.

Напрыклад, калі пазначана „Збой 3“, то цягам першых дзьвюх бітак камунікаваць нельга; камунікацыя магчымая толькі перад пачаткам трэцяй біткі.

Камандорскае рашэньне

Камандор апытвае кожнага гульца, ці лічаць яны, што здольныя выканаць усе заданьні гэтай місіі — тыя могуць адказаць толькі „так“ альбо „не“.

Атрымаўшы адказы ад усіх, камандор выбірае, хто з гульцоў атрымае заданьні. Сябе выбраць нельга.

Камандорская раздача

Падобна да вышэйшага, камандор прапануе па адным заданьні кожнаму з гульцоў, якія могуць адказаць толькі „так“ альбо „не“. Тады камандор выбірае, каму аддаць заданьне.

Так паўтараецца, пакуль ня будуць раздадзеныя ўсе заданьні. Разьмяркоўваць іх трэба раўнамерна — нельга, каб адзін гулец меў на два заданьні больш за іншага.