Gamehelpitsawonderfulworld

Вы стаіцё на чале імпэрыі, якая жадае болей моцы. Абярыце шлях, які дасьць вам хутчэйшае і лепшае разьвіцьцё ды апярэдзьце супернікаў.

Гульнявы працэс

„Гэты цудоўны сьвет“ разыгрываецца ў 4 колах па тры фазы ў кожным: Набор, Плянаваньне, Вытворчасьць.

Набор

Пры гульні на траіх і болей кожны гулец атрымлівае па 7 картаў, на дваіх — па 10. Усе гульцы адначасна пакідаюць сабе адну карту, паказваючы яе. Рэшту картаў перадаюць суседу, пакуль кожны не набярэ 7 картаў (у гульні на дваіх застануцца нявыкарыстаныя карты).

Плянаваньне

Пасьля гэтага гульцы выбіраюць, якія з выбраных картаў:

• пакінуць на будаўніцтва,

а якія

• утылізаваць (скінуць) у абмен на рэсурсы (у правым нізе карты). Атрыманыя косткі рэсурсаў кладуцца на карты, аплачваючы кошта іхняга будаўніцтва (верхні левы кут карты) ці на пачатковую картку Імпэрыі, адкуль 5 сабраных рэсурсаў адразу ж канвэртуюцца ў адну чырвоную (адвольную) костку, якую можна выкарыстаць пры патрэбе. Усе косткі рэсурсаў на пачатковай картцы выкарыстоўваюцца толькі дзеля атрыманьня чырвонага рэсурсу і ні для чаго больш.

Пасьля аплаты ўсіх коштаў карту можна дадаць на дошку Імпэрыі гульца (жэтоны на карце скідаюцца), усе бонусы (паказаныя пасяродку ўнізе пад выявай, але вышэй за ніжнюю паласу) аддаюцца на карту Імпэрыі.

Заўважце, што ў любы час можаце скінуць любую недабудаваную карту і дадаць атрыманую за гэта костку рэсурсаў на сваю карту Імпэрыі. Косткі рэсурсаў, якія ляжалі на скінутай карце, вяртаюцца ў скрыню.

Вытворчасьць

У фазе вытворчасьці вырабляюцца па чарзе шэры, чорны, зялёны, жоўты і сіні віды рэсурсаў. Кожная з гэтых вытворчасьцяў дзеліцца на тры часткі.

1. вытворчасьць косткаў гэтага колеру — кожны гулец атрымлівае столькі каляровых костак, колькі паказана на ніжнім шэрагу картаў з дошкі Імпэрыі.
2. узнагарода за найбольшую вытворчасьць — гулец, які вырабляе найбольш рэсурсаў гэтага колеру, атрымлівае адзін жэтон пэрсанажа (вартасьцю 1 ПП), паказаны на гэтыі сэктары вытворчасьці. У шэрай і жоўтай сэкцыях гэта Фінансіст, у чорнай і сіняй — Генэрал, у зялёнай — на выбар гульца.
3. разьмяшчэньне костак — як і падчас плянаваньня, рэсурсы можна пакласьці на недабудаваныя карты; забудаваныя такім чынам карты адразу кладуцца на дошку Імпэрыі і могуць вырабляць рэсурсы.

Гэтыя фазы паўтараюцца ў вытворчасьці кожнага віду рэсурсаў.

Канец кола

Недабудаваныя карты застаюцца. Ва ўсіх колах, акрамя апошняга, кожны гулец атрымлівае новыя наборы картаў і пачынае выбіраць сабе па адной, але цяпер перадае рэшту ў процілеглым кірунку.

Падлік

Кожны атрыманы жэтон пэрсанажа варты 1 ПП. Асобныя карты могуць мець вартасьць, пазначаную ў ніжнім левым куце. Некаторыя карты зарабляюць пункты перамогі ў залежнасьці ад іншых картаў, дададзеных да Імпэрыі (абразкі справа ўнізе). Перамагае гулец з найбольшай колькасьцю пунктаў. У выпадку аднолькавай колькасьці перамагае той, хто мае найбольш картаў Імпэрыі, далей — найбольш сабраных пэрсанажаў.